Presidenti i zgjedhur i SHBA-së, Donald Trump, foli me Presidentin rus Vladimir Putin dhe e këshilloi atë të mos përshkallëzojë luftën në Ukrainë, tha një burim i njohur me bisedën, por Kremlini mohoi që të dy të kishin folur. Burimi i tha Reuters të dielën se Trump, i cili ka kritikuar shkallën e mbështetjes ushtarake dhe financiare të SHBA-së për Kievin dhe tha se do ta përfundojë luftën shpejt, kishte folur me Putinin në ditët e fundit. The Washington Post, raportoi për herë të parë se telefonata kishte ndodhur, duke cituar burime të paidentifikuara, dhe tha se Trump i kishte thënë Putinit që ai nuk duhet të përshkallëzojë luftën në Ukrainë. Por, në një lëvizje të pazakontë, zëdhënësi i Kremlinit, Dmitry Peskov, tha të hënën se nuk kishte ndodhur asnjë telefonatë e tillë. “Kjo është plotësisht e pavërtetë. Kjo është thjesht trillim, është thjesht informacion i rremë,” u tha ai gazetarëve. “Nuk kishte asnjë bisedë.” “Kjo është shembulli më i qartë i cilësisë së informacionit që po publikohet tani, ndonjëherë edhe në botime mjaft të respektuara,” tha ai. I pyetur nëse Putin kishte plane për ndonjë kontakt me Trumpin, Peskov tha: “Nuk ka ende plane konkrete.” Trump foli me Presidentin ukrainas Volodymyr Zelenskiy të mërkurën e kaluar. I pyetur për telefonatën e supozuar Trump-Putin, Steven Cheung, drejtori i komunikimeve të Trumpit, tha: “Ne nuk komentojmë për telefonatat private midis Presidentit Trump dhe liderëve të tjerë botërorë.” Republikani Trump do të marrë detyrën më 20 janar pasi fitoi zgjedhjet presidenciale më 5 nëntor. Biden ka ftuar Trumpin në Zyrën Ovale të mërkurën, tha Shtëpia e Bardhë.